2023ལོར་ཕུལ་བའི་སྨོན་ཚིག
སེམས་ཀྱི་ཟབ་ས་ཞིག་ནས། །
སྨོན་འདུན་ཞིམ་པོ་རྙེད་བྱུང་། །
ཚིག་དང་དབྱངས་ཀྱིས་དཀྲོལ་བ། །
ཉིས་སྟོང་ཉི་ཤུ་རྩ་གསུམ། །
ལང་ཚོའི་འདབ་མ་ཞིག་ཀྱང་། །
ལྷོད་ལྷོད་ས་རུ་ཟགས་སོང་། །
རྣམ་དཔྱོད་མེ་སྟག་ཅིག་གིས། །
ང་རང་གསལ་དུ་བཏང་བྱུང་། །
འོག་མིན་སྲིད་པའི་གྲོང་དུ། །
ཞི་འཇམ་ཡོས་བུ་འཁྲུངས་བྱུང་། །
ཕུགས་ཀྱི་འདུན་མ་རེ་རེར། །
རེ་བའི་མངའ་ཐང་བསྩལ་བྱུང་། །
རྩུབ་པ་སྟོང་ལོ་ཉེར་གཉིས། །
འུར་ཟིང་ཁྲོད་ནས་ཡལ་སོང་། །
སྣང་བའི་གཞི་ལ་བབ་པའི། །
ཉིས་སྟོང་ཉི་ཤུ་རྩ་གསུམ། །
ཞིམ་པ་ལོ་ཆང་ཁམ་པ། །
འཇམ་པ་འབྲི་མར་སེར་པོ། །
གཡང་གི་མཚོ་མོ་སྐྱོམས་པའི། །
འབྲས་བུ་ཁྱོད་ལས་སུ་ཡོད། །
ཉིས་སྟོང་ཉི་ཤུ་རྩ་གསུམ། །
རེ་བའི་སྐར་མ་འཛིན་རོགས། །
དྭངས་གསལ་ཟླ་བ་བསུ་རོགས། །
དྲོད་འཇམ་ཉི་མ་འགུག་རོགས། །
སྣང་བའི་འདབ་མར་འཁྲུངས་པའི། །
སྨོན་ལམ་སྟོང་གི་ཉིང་བཅུད། །
སེམས་པའི་གཞི་ལ་འཁྱུད་པའི། །
ཉིས་སྟོང་ཉི་ཤུ་རྩ་གསུམ། །
དུང་དཀར་ལན་གསུམ་བུས་པ། །
སྟོང་ལོ་བསུ་བའི་ཅོང་བརྡ། །
བསང་མེ་ལྷབ་ལྷུབ་འབར་བ། །
ཉིས་སྟོང་ཉི་ཤུ་རྩ་གསུམ། །
ནམ་ལངས་ཐོ་རངས་སྐར་ཆེན། །
དེ་རིང་གསལ་དུ་སོང་འདུག །
ནང་སེམས་ངོས་སུ་བབ་པ། །
ཉིས་སྟོང་ཉི་ཤུ་རྩ་གསུམ། །
དབང་པོའི་རྩ་མདུད་གྲོལ་སོང་། །
གོམ་པའི་སྟངས་སྟབས་ཡང་བ། །
བསམ་གཞིག་ལྷག་མ་མི་དགོས། །
ཉིས་སྟོང་ཉི་ཤུ་རྩ་གསུམ། །
ཞོགས་ཇ་མངར་ཁ་འཛོམས་པ། །
རྫི་གླུའི་འགུག་ལུགས་སྙན་པ། །
ཕ་གིའི་འཇོལ་མོར་དྲིས་ཚེ། །
ཉིས་སྟོང་ཉི་ཤུ་རྩ་གསུམ། །
སྡེ་ཆེན་ཁ་ཞེང་ཡངས་པ། །
སྡེ་མི་བསམ་དོན་རང་འགྲུབ། །
བག་དང་ལྡན་པར་འཚོ་བ། །
ཉིས་སྟོང་ཉི་ཤུ་རྩ་གསུམ། །
འདས་པའི་ཕྱིར་མིག་རེ་ལ། །
དྲན་པའི་གདུང་བ་མང་བ། །
དྲན་གདུང་སེལ་བའི་སོས་སྨན། །
ཉིས་སྟོང་ཉི་ཤུ་རྩ་གསུམ། །
མི་རྟག་སྐད་ཅིག་གློག་ཡིན། །
འཁོར་བ་ལས་ཀྱི་ཤྭ་འོད། །
སྐྲག་ཀྱང་སྐྲག་དགོས་མི་འདུག།
སྟོང་ལོ་ཉེར་གསུམ་དགྱེས་ཤོག།
གླིང་བཞི་གླིང་ཕྲན་ཀུན་ཏུ། །
དམག་འཁྲུག་ནད་ཡམས་གྲོལ་ཏེ། །
སྐྱིད་པའི་མི་ཡུལ་འདི་ནས། །
ཡོས་ལོ་དཔལ་གྱིས་འཕེལ་གྱུར། །