གྱོད་དཔེ།

རང་གི་ཁྱོ་ག་རྡོ་བསྟན་བློ་སེམས་རྩེ་གཅིག་གིས་བྱ་བར་གཞོལ་དུ་འཇུག་ཆེད། སྒྲོལ་མས་འདང་གང་ཡང་མ་བརྒྱབ་པར་ལས་བསྐྱུར་བྱས་ནས་ཁྱིམ་དུ་བྱིས་པ་དང་རྒན་པ་སྙོར་སྐྱོང་གི་ལས་ལ་འབད། ལས་དོན་གོང་འཕེལ་དུ་སོང་བ་དང་བསྟུན་ནས། རྡོ་བསྟན་རིམ་བཞིན་ཁྱིམ་གྱི་ཆུང་མར་ཞེན་ལོག་སྐྱེས། རྡོ་བསྟན་ལ་གཉེན་འཐོར་འདོད་ཀྱི་བསམ་ཚུལ་ཡོད་པ་ཤེས་རྗེས་སྒྲོལ་མ་སེམས་སྡུག་གི་གཡང་དུ་ལྷུང་། དེ་ལྟར་ན་ལོ་ངོ་འགའི་རིང་ལ་སྒྲོལ་མས་ཁྱིམ་ལས་ཐད་བཏོན་པའི་སེམས་ཤུགས་ལ་ཁ་གསབ་བྱེད་ཐབས་ཤིག་ཡོད་དམ།

གྱོད་དོན་དབྱེ་ཞིབ།

གྱོད་དོན་འདིའི་རྩོད་གཞི་ནི་གཉེན་འཐོར་སྐབས་ཀྱི་ཁྱིམ་ལས་ཁ་གསབ་སྟེར་བའི་གནད་དོན་ལ་ཐུག་ཡོད་དེ། དམངས་དོན་ཁྲིམས་གཞུང་གི་གཏན་འབེབས་ལྟར་ན། བཟའ་ཟླ་ཕྱོགས་གཅིག་གིས་བུ་ཕྲུག་སྙོར་སྐྱོང་དང་རྒན་པར་སྲི་ཞུ་སྒྲུབ་པ། ཕྱོགས་གཞན་དེའི་བྱ་བར་གཞོགས་འདེགས་བྱེད་པ་སོགས་ཀྱི་ཐད་འོས་འགན་ཅུང་མང་ཙམ་ཁུར་ཡོད་ཚེ། གཉེན་འཐོར་སྐབས་ཕྱོགས་གཞན་དེར་ཁ་གསབ་སྟེར་དགོས་པའི་རེ་འདུན་བཏོན་ཆོག་ལ། ཕྱོགས་གཞན་དེས་ཀྱང་ཁ་གསབ་སྟེར་དགོས། གྱོད་དོན་འདིའི་ནང་དུ། སྒྲོལ་མས་ཁྱིམ་ཚང་སྐྱོང་བའི་ཆེད་དུ་རང་གི་ལས་ཀ་བསྐྱུར་ཅིང་། ཁྱིམ་ཚང་དེའི་ཆེད་དུ་ཁྱོ་ག་ལས་ལྷག་པའི་སེམས་ཤུགས་དང་རྔུལ་ཆུ་མང་ཙམ་བཏོན་ཡོད་ལ། ལས་ཀ་བསྐྱུར་ནས་ལོ་མང་འགོར་རྗེས་ཡང་བསྐྱར་ལས་ཀར་ཞུགས་པར་གནོན་ཤུགས་དང་དཀའ་ཁག་ཅུང་ཆེ་བ་རེད། གཉེན་འཐོར་སྐབས། གལ་ཏེ་གྲོས་མཐུན་ཡི་གེའི་སྟེང་ཁ་གསབ་སྟེར་རྒྱུ་ཁ་ཆད་བྱས་ཡོད་ན། གྲོས་མཐུན་ཡི་གེ་ལྟར་བགོ་བཤའ་བརྒྱབ་ཆོག གལ་ཏེ་གྲོས་མཐུན་ཡི་གེ་མེད་ན། ཁྲིམས་ཁང་གིས་ཁྱིམ་ཚང་ལ་སེམས་ཤུགས་མང་ཙམ་བཏོན་པའི་ཕྱོགས་ལ་གཟིགས་སྐྱོང་བྱེད་སྲིད། དེའི་ཕྱིར། སྒྲོལ་མར་རྡོ་བསྟན་གྱིས་རང་ལ་དཔལ་འབྱོར་གྱི་ཁ་གསབ་སྟེར་བའི་རེ་འདུན་འདོན་རྒྱུའི་དབང་ཆ་ཡོད།

འབྲེལ་ཡོད་ཁྲིམས་ཚན།

དོན་ཚན1088པ། བཟའ་ཟླ་ཕྱོགས་གཅིག་གིས་བུ་ཕྲུག་སྙོར་སྐྱོང་དང་རྒན་པར་སྲི་ཞུ་སྒྲུབ་པ། ཕྱོགས་གཞན་དེའི་བྱ་བར་གཞོགས་འདེགས་བྱེད་པ་སོགས་ཀྱི་ཐད་འོས་འགན་ཅུང་མང་ཙམ་ཁུར་ཡོད་ཚེ། གཉེན་འཐོར་སྐབས་ཕྱོགས་གཞན་དེར་ཁ་གསབ་སྟེར་དགོས་པའི་རེ་འདུན་བཏོན་ཆོག་ལ། ཕྱོགས་གཞན་དེས་ཀྱང་ཁ་གསབ་སྟེར་དགོས། བྱེ་བྲག་གི་བྱེད་ཐབས་ཕྱོགས་གཉིས་ཀས་གྲོས་མོལ་བྱས་ནས་ཐག་གཅོད་དགོས། གྲོས་མཐུན་མ་བྱུང་ཚེ། མི་དམངས་ཁྲིམས་ཁང་གིས་ཁྲིམས་ཐག་གཅོད་རྒྱུ།

ཁྲིམས་ཚན་ཞིབ་འགྲེལ།

དོན་ཚན་འདི་ནི་དམངས་དོན་ཁྲིམས་གཞུང་ལས་གཉེན་འཐོར་སྐབས་ཀྱི་ཁྱིམ་ལས་ཁ་གསབ་སྟེར་བའི་ཐད་ཀྱི་གཏན་འབེབས་རེད།

ཁྱིམ་ལས་ཁ་གསབ་ཅེས་པ་ནི་གཉེན་སྒྲིག་གི་འབྲེལ་བ་ཡོད་པའི་དུས་སྐབས་སུ། ཕྱོགས་གཅིག་གིས་ཁྱིམ་ལས་ཐད་སེམས་ཤུགས་བཏོན་པ་ཅུང་མང་ན། གཉེན་འཐོར་སྐབས་ཕྱོགས་གཞན་དེས་དཔལ་འབྱོར་ཁ་གསབ་ངེས་ཅན་ཞིག་སྟེར་དགོས་པའི་རེ་བ་འདོན་དབང་ཡོད་པའི་ལམ་ལུགས་ལ་གོ། ཁྱིམ་ལས་ངལ་རྩོལ་ཁ་གསབ་ནི་གཉེན་འཐོར་ལམ་ལུགས་ཁྲོད་ཀྱི་སྒེར་ཚུགས་ཀྱི་ལམ་ལུགས་ཤིག་ཡིན་ཞིང་། དེའི་ངོ་བོ་ནི་གཉེན་འཐོར་སྐབས་ཐུན་མོང་རྒྱུ་ནོར་བགོ་བཤའ་རྒྱག་པ་དང་འདྲ་བ་ལས། གཉེན་འཐོར་སྐབས་གནོད་སྐྱོན་གྱོང་གསབ་སྟེར་བ་དང་མི་འདྲ། ཁ་གསབ་སྟེར་བའི་རེ་བ་འདོན་དབང་ལག་བསྟར་བྱེད་མིན་དེ་རེ་བ་འདོན་མཁན་གྱིས་ཐག་གིས་བཅད་ཆོག

ལམ་ལུགས་འདི་བཙུགས་པས་ཁྱིམ་ལས་ངལ་རྩོལ་གྱི་སྤྱི་ཚོགས་རིན་ཐང་མཐོར་འདེགས་གཏོང་བ་དང་ཁྱིམ་ཚང་ལ་བྱས་རྗེས་ཅུང་ཆེ་བའི་ཕྱོགས་ཀྱི་ཁྲིམས་མཐུན་ཁེ་དབང་སྲུང་སྐྱོབ་བྱེད་པར་དོན་སྙིང་ཤིན་ཏུ་གལ་ཆེན་ལྡན། །