“སྡེ་ཁུལ་གྱི་གཞིས་དམངས་རྣམ་པ།ཚང་མ་བདེ་མོ། ཉིན་འདི་འགར་རླངས་འཁོར་ཁ་ཤས་ཤིག་གི་འཇོག་སྟངས་ཚད་ལྡན་མིན་པས། གཅིག་ནས་རང་ཅག་གི་མེ་འགོག་བདེ་འཇགས་ལ་གནོད་པ་དང་།གཉིས་ནས་སྡེ་ཁུལ་གྱི་རྣམ་པར་ཤན་ཤུགས་ངན་པ་ཐེབས་ཀྱིན་ཡོད་པས།ཁྱེད་རང་གལ་ཏེ་རང་སྡེ་ཁུལ་གྱི་གཞིས་དམངས་ཡིན་ན།ངེས་པར་རླངས་འཁོར་ཚད་ལྡན་གྱིས་འཇོག་དགོས་ལ།གལ་ཏེ་གླ་སྡོད་ཁྱིམ་ཚང་ཡིན་ན།གཡས་གཡོན་ཁྱིམ་མཚེས་ཀྱིས་ཕན་ཚུན་ལ་རླངས་འཁོར་ཚད་ལྡན་གྱིས་འཇོག་དགོས་པའི་བརྡ་བརྒྱབ་སྟེ།ཚང་མས་མཉམ་དུ་བདེ་འཇགས་ཡིན་ལ་བདེ་སྐྱིད་ལྡན་པའི་སྡེ་ཁུལ་ཁོར་ཡུག་ཅིག་བསྐྲུན་རྒྱུ་མཁྱེན་མཁྱེན།”

ཟླ7པའི་ཚེས1ཉིན།ཡུས་ཧྲུའུ་བོད་རིགས་རང་སྐྱོང་ཁུལ་ཡུས་ཧྲུའུ་གྲོང་ཁྱེར་བྱ་ཤུལ་ཁོག་སྲང་ལམ་བྱ་ཤུལ་ཁོག་སྡེ་ཁུལ་གྱི་གཞིས་དམངས་པདྨ་རྡོ་རྗེ་ཡིས་སྐད་འཕྲིན་ཚོགས་པ་རུ་ཚང་མར་ཉིན་འདི་འགའི་རླངས་འཁོར་འཇོག་སྟངས་མི་ལེགས་པའི་རྣམ་པ་དེ་གླེང་གིན་འདུག

“ལེགས་སོ།གོ་སོང་།”

“རེད་ཡ།རླངས་འཁོར་ལམ་ནང་དུ་བཞག་ན་བདེ་འཇགས་ལ་གནོད།”

“གླ་སྡོད་ཁྱིམ་ཚང་ཡང་སྡེ་ཁུལ་གྱི་གནས་སྐབས་ཁོངས་མི་ཡིན་པས།ཁོ་ཚོར་ཡང་རླངས་འཁོར་ཚད་ལྡན་གྱིས་འཇོག་དགོས་པ་གསལ་པོར་བཤད་དགོས།”

འཕྲིན་ཐུང་བསྐུར་མ་ཐག་ཏུ་སྐད་འཕྲིན་ལས་མི་མང་པོ་ཞིག་གིས་གཅིག་རྗེས་གཉིས་མཐུད་ཀྱིས་རྒྱབ་སྐྱོར་བྱས་བྱུང་།

“སེམས་པ་གཅིག་ཏུ་སྦྲེལ་ཏེ་དོན་དག་ཡོད་ན་ཚང་མས་མཉམ་དུ་བསྒྲུབ”ཅེས་བོད་རིགས་རྒན་པ་པདྨ་རྡོ་རྗེ་ནི་སྡེ་ཁུལ་གྱི་སེམས་རྩ་འཁོལ་བའི་མི་ཞིག་ཡིན་ལ།ཏང་ཡོན་རྒན་པ་ཞིག་ཡིན་པའི་ཆ་ནས།ཁོས“རླངས་འཁོར་ཚད་ལྡན་གྱིས་འཇོག་པ་དང་ཁྱིམ་མཚེས་བར་གྱི་འགལ་བ་འདུམ་འགྲིག་བྱེད་པ།གད་སྙིགས་རིགས་དབྱེ་དགོས་པའི་འབོད་སྐུལ་གཏོང་བ།སྡེ་ཁུལ་གྱི་ཁོར་ཡུག་བཅོས་སྐྱོང་བྱེད་པ།རྒན་པ་ཁེར་འདུག་ཅན་ལ་བདག་སྐྱོང་བྱེད་པ་སོགས་བྱ་བ་ཅི་ཞིག་ཡོད་ན་ཚང་མ་དང་མཉམ་དུ་གྲོས་མོལ་བྱེད་པ་དང་འགན་དུ་བླངས་ཏེ།ཕན་ཚུན་ལ་རོགས་རམ་བྱེད་རྒྱུ་དེ་ཚང་མའི་རང་འགུལ་གྱི་བྱ་སྤྱོད་དང་འཚོ་བའི་གོམས་གཤིས་སུ་འགྱུར་དུ་འཇུག་དགོས”ཞེས་བཤད།

“སྡེ་ཁུལ་གྱི་ཁོར་ཡུག་སྔར་ལས་ཇེ་ཡག་ནས་ཇེ་ཡག་ཡིན་ལ།ཚང་མ་སྔར་ལས་འགྲིག་མཐུན་རེད”ཅེས་པ་ནི་གཞིས་དམངས་རྣམས་ཀྱི་སེམས་ཁོང་རུས་པའི་གཏིང་ནས་བྱུང་བའི་མྱོང་ཚོར་ཟབ་མོ་དེ་ཡིན་པས།ད་ལྟའི་སྐྱིད་སྣང་སྔར་ལས་ཇེ་མཐོ་ནས་ཇེ་མཐོ་རེད།“ང་ཚོའི་སྡེ་ཁུལ་དུ་སྔོན་ཆད་གད་སྙིགས་གང་སར་འཕོ་བཞིན་ཡོད། སྲང་ལམ་དང་སྡེ་ཁུལ་གཞིས་དམངས་རྣམས་ཀྱི་འབད་བརྩོན་འོག་ད་ལྟ་སྡེ་ཁུལ་ལ་འགྱུར་ལྡོག་ཆེན་པོ་བྱུང་ཞིང་།ལམ་ངོས་སྔར་ལས་སྙོམས་ཤིང་གད་སྙིགས་གཅིག་ཀྱང་མཐོང་རྒྱུ་མེད་པས་ང་ཚོའི་འཚོ་བ་བདེ་ཞིང་སྐྱིད་པ་ཞིག་ཡིན”ཞེས་ཧོར་རིགས་གཞིས་དམངས་ཆི་ཐུང་པང་གིས་དེ་ལྟར་བཤད།

མི་རིགས་མང་པོ་འདུས་སྡོད་བྱས་པའི་སྡེ་ཁུལ་ཞིག་ཡིན་པས།བྱ་ཤུལ་ཁོག་སྡེ་ཁུལ་དུ་བསྡོམས་པས་ཁྱིམ་ཚང1555ཡོད་ལ།སྤྱིའི་མི་གྲངས5439ཡོད།མི་རིགས་མང་པོ་མཉམ་དུ་སྡོད་ཅིང་།ཁོངས་གཏོགས་ཁུལ་ཚང་མ་སྒོ་འབྱེད་ཅན་གྱི་ར་སྐོར་ཡིན་པས་ཁྱབ་ཁོངས་ཧ་ཅང་ཆེ་མོད།འོན་ཀྱང་ཁྱིམ་མཚེས་བར་འགྲོ་འོང་མང་ཞིང་མཛའ་བརྩེ་ཟབ་ལ།གནས་འདི་རུ་བོད་རིགས་དང་རྒྱ་རིགས།ཧུའེ་རིགས།ཧོར་རིགས།སོག་རིགས་སོགས་མི་རིགས་མང་པོ་འགྲིག་མཐུན་གྱིས་མཉམ་འདུག་བྱས་ཡོད།

བྱ་ཤུལ་ཁོག་སྡེ་ཁུལ་གྱི་ཏང་དང་མང་ཚོགས་ཞབས་ཞུ་ལྟེ་གནས་སུ་སོང་བ་ན།སེ་འབྲུའི་ཚི་གུའི་འཇིམ་བརྐོས་ཤིག་མིག་ལམ་དུ་མངོན་ཞིང་།འཇིམ་བརྐོས་དེའི་འོག་ཏུ“མི་རིགས་སོ་སོ‘སེ་འབྲུའི་ཚི་གུ’བཞིན་དམ་དུ་སྦྲེལ་དགོས”ཞེས་བྲིས་འདུག

“གནས་འདི་ནི་སྡེ་ཁུལ་སྡོད་དམངས་ཀྱི་ཞབས་ཞུ་ས་ཚིགས་ཡིན་ལ།ཚང་མ་མཉམ་དུ་འཛོམས་ས་ཡང་ཡིན་པས།དུས་རྒྱུན་དུ་ང་ཚོས་འདི་རུ་ཏང་དང་མི་རིགས་ཀྱི་གཞུང་ལུགས་དང་སྲིད་ཇུས་སློབ་སྦྱོང་བྱེད་པ་དང་།མི་རིགས་མཐུན་སྒྲིལ་ཡར་ཐོན་སྔོན་ཐོན་དཔེ་སྟོན་སོགས་ཀྱི་བཞུགས་མོལ་མཛའ་མཐུན་ཚོགས་པ་བསྡུས་ནས།མི་རིགས་མཐུན་སྒྲིལ་གྱི་གཏམ་རྒྱུད་ལེགས་པོར་བཤད་པ་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་གཏོང་གིན་ཡོད་པས།སྡེ་ཁུལ་གྱི་མི་རིགས་མཐུན་སྒྲིལ་ཇེ་བཟང་ནས་ཇེ་བཟང་རེད”ཅེས་སྡེ་ཁུལ་གྱི་ཏང་ཀྲི་པུའུ་ཧྲུའུ་ཅི་བསོད་དབང་དཔལ་ལྡན་གྱིས་གསར་འགོད་པར་དེ་ལྟར་བཤད།

སྡེ་ཁུལ་གྱིས་ད་རུང་རིག་རྩལ་བྱ་འགུལ་མང་པོ་བསྡུ་བ་དང་།མི་རིགས་མཐུན་སྒྲིལ་ཡར་ཐོན་དྲིལ་སྒྲོག་ཟླ་བ་དང་བརྒྱད་པའི་བཅོ་ལྔ།དགུ་པའི་ཚེས་དགུ་སོགས་སྲོལ་རྒྱུན་གྱི་དུས་ཆེན་སྐབས་སུ།མི་རིགས་མཐུན་སྒྲིལ་ཡར་ཐོན་གྱི་བྱ་འགུལ་རྒྱ་ཁྱབ་ཏུ་སྤེལ་བཞིན་ཡོད།ཉམས་སྤྲོ་བའི་ལུས་རྩལ་བྱ་འགུལ་སྤེལ་བ་དང་རིག་རྩལ་འཁྲབ་སྟོན་བྱས་ཏེ།རིགས་སོ་སོའི་མང་ཚོགས་ལ་སྤྲོ་སྐྱིད་ཀྱི་ཁོར་ཡུག་ཁྲོད་ནས་ཀྲུང་ཧྭའི་རིག་གནས་ཀྱི་འགུག་ཤུགས་ཉམས་སུ་མྱོང་དུ་འཇུག་པ་དང་།ཁོ་ཚོའི་ཀྲུང་ཧྭའི་རིག་གནས་ཀྱི་ངོས་ཟིན་འདུ་ཤེས་དང་ཁོངས་གཏོགས་འདུ་ཤེས་སྔར་ལས་ཇེ་མཐོར་གཏོང་གིན་ཡོད།

བསོད་དབང་དཔལ་ལྡན་གྱིས་བཤད་རྒྱུར། “ལོ་རེའི་རྗེས་དྲན་ཉིན་མོ་དང་ཀྲུང་ཧྭ་མི་རིགས་ཀྱི་སྲོལ་རྒྱུན་དུས་ཆེན་སྐབས་སུ།སྡེ་ཁུལ་གྱིས་མི་རིགས་མཐུན་སྒྲིལ་ཐད་ཀྱི་སློབ་གསོའི་བྱ་འགུལ་སྣ་ཚོགས་སྤེལ་ཏེ།‘ངོས་ཟིན་ལྔ’ཇེ་དྲག་ཏུ་གཏོང་བར་མ་ཟད།ཞབས་བྲོ་དང་མཉམ་ལེན་སོགས་རིག་རྩལ་བྱ་འགུལ་རྣམ་པ་སྣ་ཚོགས་སྤེལ་ཏེ།རིགས་སོ་སོའི་མང་ཚོགས་ཀྱི་རིག་གནས་འཚོ་བ་ཕུན་ཚོགས་སུ་གཏོང་བ་དང་།ཚང་མར་བསམ་བློ་བརྗེ་རེས་ཀྱི་སྟེགས་བུ་ཞིག་ཀྱང་བཏོན་ཏེ།ཁོ་ཚོར་མཉམ་དུ་ཞུགས་པའི་ཁྲོད་ནས་ཕན་ཚུན་ལ་རྒྱུས་ལོན་དང་མཛའ་བརྩེ་ཇེ་ཟབ་ཏུ་གཏོང་རོགས་བྱེད་ཀྱིན་ཡོད་པས།རིགས་སོ་སོའི་མང་ཚོགས་ཁྱིམ་ཚང་གཅིག་ལྟར་མཉམ་དུ་འདྲེས་ཡོད།”

སྡེ་ཁུལ་གྱིས་ད་རུང་རང་ཁྱབ་ཁོངས་ཀྱི་ཏང་ཡོན་རྒན་པ་གདན་དྲངས་ནས་སྡེ་ཁུལ་གྱི་ཏང་ཡོན་དང་རིགས་སོ་སོའི་མང་ཚོགས་ལ་ཨ་ཆེན་གངས་རྒྱབ་ལ་སྲུང་སྐྱོབ་དང་ཡུས་ཧྲུའུ་ཡིས་ཡོམ་འགོག་རྒུད་སྐྱོབ་བྱས་པའི་གཏམ་རྒྱུད་བཤད་དུ་བཅུག་ནས། སྔོན་ཐོན་གྱི་བྱས་རྗེས་དང་རླབས་ཆེ་བའི་སྙིང་སྟོབས་ཀྱི་ཤུགས་རྐྱེན་འོག སྡེ་ཁུལ་གྱི་ཏང་ཡོན་དང་གཞིས་དམངས་ཀྱི་མི་རིགས་མཐུན་སྒྲིལ་འདུ་ཤེས་ཇེ་མཐོར་བཏང་བར་མ་ཟད།རྒྱལ་གཅེས་ཁྱིམ་གཅེས་ཀྱི་བརྩེ་སེམས་བསླངས།

“ང་ཚོའི་སྡེ་ཁུལ་ནི་མི་རིགས་མང་པོ་འཛོམས་པའི་གཞིས་ཁྱིམ་ཆེན་མོ་ཞིག་ཡིན་ལ།དུས་རྒྱུན་དུ་ཁྱིམ་མཚེས་བར་གྱི་འབྲེལ་བ་ཧ་ཅང་བཟང་བར་མ་ཟད།སྡེ་ཁུལ་གྱི་བྱ་འགུལ་ཡང་ཧ་ཅང་སྣ་འཛོམས་ཡིན།ད་ལོའི་ལྔ་པའི་ཚེས་ལྔ་ཉིན། སྡེ་ཁུལ་གྱིས་ཚང་མའི་སྣེ་ཁྲིད་དེ‘ལྔ་བའི་ཚེས་ལྔའི་དུས་ཆེན་སྤྲོ་ཞིང་སྐྱིད།།སེ་འབྲུ་ཚི་གུ་བཞིན་དུ་དམ་ཞིང་སྦྲེལ།།’ཞེས་པའི་དུས་ཆེན་གྱི་བྱ་འགུལ་སྤེལ་བ་དང་།ཚང་མས་མཉམ་དུ་ཟ་མ་ལས་ཤིང་བདེ་སྐྱིད་གླེང་སྟེ།དུས་ཆེན་སྐྱིད་པོ་ཞིག་རོལ་བ་ཡིན།” གཞིས་དམངས་ཙེང་ཧོང་ཧྭ་ཡིས་མཐུན་སྒྲིལ་བཟང་ཞིང་ཕན་ཚུན་ལ་རོགས་རམ་བྱས་ཏེ་ཁྱིམ་ཚང་གཅིག་ལྟར་མཛའ་བརྩེ་ཟབ་པའི་སྡེ་ཁུལ་འདི་ལྟ་བུ་ཞིག་ཏུ་འཚོ་བ་ནི་བདེ་སྐྱིད་ཅིག་རེད་ཟེར།

“ལོ་རེའི་ལོ་མཇུག་ཏུ།སྡེ་ཁུལ་གྱིས་ཁྱབ་ཁོངས་ཀྱི་གཞིས་དམངས་མཉམ་དུ་བསྡུས་ཏེ་རྩེད་རིགས་སྦྱོང་བ་དང་།སྡེ་ཁུལ་གྱི་ལས་བྱེད་པ་དང་མཉམ་དུ《ཨ་མ་གཅིག་གི་བུ་མོ》དང《མི་རིགས་ལྔ་བཅུ་ང་དྲུག》སོགས་ཀྱི་སྤྲོ་སྐྱིད་ལྡན་ཞིང་བརྗོད་དོན་ཟབ་པའི་གླུ་དབྱངས་ལེན་བཞིན་ཡོད། དེས་མི་ཚད་ད་རུང་སྡེ་ཁུལ་གྱིས་ཆེད་དུ་ང་ཚོར་ཐུགས་ཁུར་བྱེད་པ་དང་།ཁྱིམ་ཚང་རེ་རེའི་འཚོ་བའི་གནས་བབ་སྟེ་ཚང་མར་དཀའ་ཁག་ཅི་ཞིག་ཡོད་པ་སོགས་ལ་རྒྱུས་ལོན་ཞིབ་མོ་བྱེད་ཀྱིན་ཡོད་ལ།དེ་ནི་ང་ཚོ་རིགས་སོ་སོའི་མང་ཚོགས་ལ་མཚོན་ན།སེམས་དྲོ་བའི་དོན་དག་ཅིག་རེད”ཅེས་ཆི་ཐུང་པང་གིས་སེམས་ཚོར་ཡོད་པའི་སྒོ་ནས་དེ་ལྟར་བཤད། །