ལོ་གཡང་དུང་དཀར་རྒྱང་གྲགས།
མི་འདོད་ནད་ཡམས་མཆེད་པའི་ཟུག་རྔུ་དྲག །
མི་ཤི་རྟ་འགྱེལ་གཡུལ་འཁྲུག་འཛིང་ག་རྩུབ། །
དུས་མིན་ཧར་གྱིས་རྒོལ་བའི་གནོད་འཚེ་འབེལ། །
དམར་ཡག་སྟག་ལོ་བཙན་ཉམས་འཇིགས་རེ་ལྟོས། །
ལོ་རྙིང་ཕར་བསྐྱལ་ལོ་གསར་ཚུར་ལ་བསུ། །
རེ་འདུན་གསར་པ་བསྣམས་པའི་ལྷ་དར་གཙང་། །
ལེགས་ཚོགས་དགེ་བའི་བཀྲ་ཤིས་རེ་ཁྰ་གསལ། །
ཚེ་བསོད་བདེ་སྐྱིད་འཕེལ་བའི་ཁ་གཡང་འཇེབས། །
བཀྲ་ཤིས་དུང་དཀར་སྙན་པའི་དབྱངས་སུ་འཁྲོལ། །
རླུང་རྟ་སྡེ་བཞི་ཁ་བའི་མདངས་སུ་རྩེན། །
བཀྲ་ཤིས་ལྷ་བསང་རི་གསུམ་རྩེ་ན་འགྱུ། །
རིག་ལྡན་ཡོས་བུ་སླེབས་པའི་མཚན་མའོ། །
ཁྲ་ཚོན་སྣ་ལྔའི་ལྒང་ཞུ་སྐར་མར་འཕོས། །
མར་མེ་མཚན་འབར་འོད་དཀར་ཟླ་ལས་སྒེག །
མཆོག་གསུམ་ལྷ་ལ་གསོལ་བའི་དད་པའི་སྟོབས། །
ལོ་གསར་བསུ་བའི་རྟེན་འབྲེལ་གཡང་དུ་འཁྲུངས། །
རི་ལུང་དཀྲོགས་པའི་ཤོག་སྦག་ལྷང་ལྷང་ལྡིར། །
བསུང་ཞིམ་བདུག་སྤོས་སྒོ་རའི་ཁུད་ན་འཕྱོ། །
གནའ་ཉམས་གསོན་པའི་དམངས་གླུའི་འགྱུར་ཁུགས་བཀྲག །
གཞིས་བྱེས་ལྷན་དུ་འཛོམས་པའི་ཡོ་ལང་བཞད། །
ཤ་ཐུད་རི་རབ་བརྩིགས་པའི་རྔམས་ཀ་མཐོ། །
ཇ་ཆང་མཚོ་མོ་ལྟེམས་སེ་མེར་གྱིས་འཁྱིལ། །
ཤོམ་ལྭ་གོས་གསར་མནབས་པའི་དགའ་སྣང་འཕྱུར། །
ཕུན་ཚོགས་ཕྱྰ་གཡང་འཁོར་བའི་དཔལ་དུ་གཏམས། །
ལོ་གསར་སྐྱེས་ལ་བྱིས་པའི་རེ་བ་བརྟས། །
ཉེ་དུ་རྩ་ལག་ཉུལ་བའི་གཡང་རྟེན་ཟས། །
ལག་ལ་མ་ཤོང་དགའ་འཛུམ་བྲག་ཅར་བསྐུར། །
ལོ་གཡང་འབྲུ་སྙེ་ལྡེམ་པའི་ངང་ཚུལ་ལོ། །
སྙན་པའི་གཏམ་དང་ཁ་གཡང་སྨོན་འདུན་ཚིག །
གཡང་ཁྱིམ་བར་ན་གཡུང་དྲུང་རིས་སུ་འཐག །
བརྩེ་བ་དར་ལ་བརྒྱུས་པའི་སྟངས་སྟབས་གར། །
གཡང་འཁྱིལ་གནམ་ལོ་གསར་བའི་འབྲས་སུ་ཤར། །
གཡང་ཕྱུགས་འཕེལ་བའི་སྲུང་ཐོག་བལ་དཀར་འཇམ། །
ལོ་ཡག་འཁྲུངས་པའི་ཆབ་རོམ་ཞིང་སར་བརྡལ། །
སྣོད་བཅུད་ཀླུ་རུ་འགུག་པའི་ཆོ་ག་མཆོག །
དགེ་བཅུ་དཔལ་དུ་འཛོམས་པའི་ལམ་བཟང་ངོ་། །
གནམ་ལོ་གསར་པའི་རྟེན་འབྲེལ་ཕུན་ཚོགས་དགེ། །
བཀྲ་ཤིས་དུས་བཟང་ཡག་པའི་དཔལ་དུ་ཚེས། །
ཚེ་རིང་ནད་མེད་ཅི་བསམ་ལྷུན་གྲུབ་དོན། །
ཡོས་ལོར་ཉི་ཟླ་ཇི་བཞིན་འཆར་བར་ཤོག །