（པར་ངོས17པར་མཐུད་པ།）སྐྱ་ལོ་སྟོན་པ་རྒྱལ་མཚན།འོམ་བུའི་ཨ་ནུ་དཔའ་སེང་།གསེར་པའི་ཉི་འབུམ་དར་ཡག དཔའ་ལ་སེང་སྟག་ཨ་དོམ།འབྲུ་སྒ་སྡེ་ཆོས་སྐྱོང་བེར་ནག སྟག་རོང་ཨ་ནུ་གཟིག་འཕེན།འཇང་སྲས་གཡུ་ཁྲི་གུང་སྔོན། འཇང་ཕྲུག་གཡུ་ལྷ་ཐོག་འགྱུར། དུང་སྐྱོང་སྟག་ལྷ་ཁྲི་དཀར། སྐྱ་ལོའི་སྣང་སྲས་གཡུ་སྟག སྐྱ་ལོའི་བུ་ཡག་འབྲུག་རྒྱལ། ཨ་འབར་བུ་ཡི་འཕེན་སྟག མི་ཆེན་རྒྱལ་བའི་ལྷུན་འགྲུབ།གླིང་ཆེན་ཐར་བུ་བསོད་ནམས།བརྒྱ་དཔོན་བན་དེ་དམར་ལུ།སྟོང་དཔོན་ཡ་མི་སོ་ཁྲ།དཀར་རུ་ཉི་མ་རྒྱལ་མཚན།དབང་བཅོད་དབང་པོ་དར་ཕན།ཨ་དགེ་ཚངས་པའི་ངོ་ལུག མོ་མ་ཀུན་ཤེས་ཐིག་པོ།སྒྱུ་མཁན་ཁ་ཆེ་མིག་དམར།བཅོ་ལྔའི་དཔའ་གསར་ཟླ་བ།འབྲུ་མི་དཀར་ལྷའུ་བསམ་འགྲུབ།རྨ་ཉིན་རྫོང་དཔོན་པོ་ལྷ་ཀླུ། གཡུང་ཡག་མགོན་པོ་སྟོང་ཐུབ།ཁྲ་གདོང་བསྟན་འཛིན་གྲགས་པ།ག དོང་བཙན་སྣང་ངུ་ཨ་བརྟན།འབྲུ་སྲས་ནམ་མཁའི་ཐོག་རྒྱལ།གསེར་པའི་བུ་ཆུང་ཐར་ཡག འོམ་བུའི་སྤྱང་ཁྲི་རྔམ་ཆེན། འཇང་ཁུ་བྱུག་པདྨ་ཉི་གྲགས།བེར་ཐུལ་བུ་ཡི་ལྷ་རྒོད།གཡུ་སྲས་གཡུ་འབྲུག་ཐོག་རྒྱལ།རྨི་ལི་དཔོན་པོ་བྲག་བཙན།མོན་ཕྲུག་ཟླ་བ་ཁྲབ་བཙན།ཤིང་རོང་རྨ་བྱ་བཙན་པོ།མོན་གྱི་ཨ་ཁུ་རྡོ་རྒན།ཨ་གྲགས་ཉི་མ་གྲགས་པ།སྙེ་མོའི་སྟག་ཚང་ཞལ་དཀར།མཐིང་ཤོད་འཕྲུལ་ལྕེ།ཞང་ཞུང་སྟག་མོ་ཁྲི་བརྟན།སོག་སེར་པོའི་སྟག་དམར་སྟོབས་ཆེན།སྟོབས་རྒྱལ་རིན་ཆེན་གྲགས་པ།ཁྱི་ཤི་བུ་ཡི་རྒུ་རུ།སྒ་སྐྱ་ལོ་སེང་ལྕམ་འབྲུག་མོ།སྔོ་ལོ་བུ་མོ་ནེའུ་ཆུང་།གྲོ་ལོ་པད་དཀར་ལྷ་མཛེས།སྤྱི་དཔོན་བུ་མོ་གཡུ་སྒྲོན།ཚ་ཞང་བུ་མོ་མཛེས་སྒྲོན།ཡ་ཐའི་བུ་མོ་གསེར་མཚོ།ཁྲོ་ཐུང་བུ་མོ་ཁྲོ་མཚོ།མ་ཡུམ་འགོག་བཟའ་ལྷ་མོ།རྒྱ་བཟའ་ལྷ་དཀར་སྒྲོལ་མ།རག་བཟའ་དགེ་མཚོ།འདན་བཟའ་གསེར་མཚོ།མེ་བཟའ་འབུམ་སྐྱིད།མགར་བཟའ་ཆོས་སྒྲོན།འཇང་བཟའ་པདྨ་ཆོས་སྒྲོན།མོན་བཟའ་མེ་ཏོག་ལྷ་མཛེས།དར་བཟའ་གཡུ་སྒྲོན་བཅས་ཀྱི་སྣང་བརྙན་གྱིས། ལོ་ངོ་སྟོང་ཕྲག་གཅིག་གི་རྗེས་སུ་སྐྱེས་པའི་ང་ཚོའི་ཡིད་དབང་ཐང་ཀའི་སྒྱུ་རྩལ་ལ་བརྟེན་ནས་རིམ་གྱིས་བཀུག་འགྲོ་བ་རེད།
མི་སྒེར་པ་སུ་ཞིག་ཡིན་རུང་སེམས་སུ་འཆར་བཀོད་སྣ་ཚོགས་འཐེན་ཕོད་པ་དང་ཁ་ནས་གང་དྲན་བཤད་སླ་བོ་རེད་དེ།ང་རང་ཉིད་ཀྱང་སྟོང་བསམ་ལ་དགའ་བ་ཞིག་ཡིན། འོན་ཀྱང་སེམས་སུ་དྲན་པ་དང་ཁ་ནས་བཤད་པ་དེ་མངོན་སུམ་འཚོ་བའི་ཁྲོད་དུ་ལག་ལེན་ཏུ་བསྟར་རྒྱུ་ནི་ཧ་ཅང་དཀའ་བར་འདུག ཡེ་ཤེས་ཆོས་འཕེལ་ལགས་ལ་མཚོན་ན། རབ་བྱུང་མཁན་པོ་ཞིག་ཡིན་པ་མ་གཏོགས་ཁེ་ལས་སོགས་ཀྱི་ཚོང་བདག་ཅིག་མ་རེད།ཁོང་གིས་རང་གི་ཐབས་ཤེས་རབ་དང་ཚེགས་བརྩོན་འགྲུས་ལ་བརྟེན་ནས་ལས་རིགས་ལག་རྩལ་སློབ་གྲྭ་ཞིག་དབེན་པའི་ལུང་ཁུག་ཏུ་བཙུགས་ཤིང་། སློབ་གྲྭ་འགྲིམ་པའི་སྐལ་བ་མ་ལྡན་པའི་བོད་པའི་བུ་ཕྲུག་ཕོ་མོ་སྐོར་ཞིག་ཐག་ཉེ་རིང་གི་ཡུལ་ལུང་སོ་སོ་ནས་བསྡུས་ཏེ་རིན་མེད་དུ་རིག་གནས་ཤེས་བྱ་དང་ལག་རྩལ་སྦྱང་དུ་བཅུག་པ་ནི་དེ་བས་ཀྱང་ལས་སླ་བོ་ག་ལ་ཡིན།ད་དུང་ཡང་།ཁོས་ཐང་ཀའི་དགེ་རྒན་གྲགས་ཅན་གདན་ཞུས་ཏེ་སློབ་ཕྲུག་ཚོར་ཡུན་རིང་བོར་བྲིས་རྒྱུན་འཁྲིད་རྒྱུ་དང་ཐང་ཀའི་རྒྱུན་འཛིན་པ་གསོ་སྐྱོང་བྱེད་པའི་ལས་ཀ་ནི་དཀའ་ངལ་ཅི་ཙམ་ལ་གདོང་གཏད་དགོས་པ་ཁོང་རང་ཉིད་ཀྱིས་ཤེས་པ་ལས་གཞན་སུས་ཀྱང་རྟོགས་མི་སྲིད། དེ་ལས་ཀྱང་མ་དཔེ་སྟོན་མཁན་མེད་ལ་ཟུར་བལྟ་བྱེད་སའང་མེད་པར་གེ་སར་སྒྲུང་གི་མི་སྣ་དང་གཏམ་རྒྱུད་བརྗོད་བྱ་མི་འདྲ་བ་བརྒྱ་ཕྲག་གཅིག་ཙམ་དགེ་སློབ་རྣམས་ཀྱིས་མཉམ་གཅིག་ཏུ་བྲི་དགོས་ཚེ།དེ་ལ་བློ་དང་སྤོབས་པ་ག་ཚོད་དགོས་པ་གནམ་གྱིས་མཁྱེན་པ་རེད།ཡེ་ཤེས་ཆོས་འཕེལ་ལགས་ཀྱི་ལས་རིགས་ལག་རྩལ་སློབ་གྲྭ་དེ་ཚད་ཅི་འདྲ་ཞིག་ལ་འཕེལ་རྒྱས་འགྲོ་ཐུབ་པ་ངས་མི་ཤེས་ལ།སློབ་གྲྭའི་དགེ་སློབ་ཀྱིས་མཉམ་གཅིག་ཏུ་བྲིས་པའི་སྒྲུང་ཐང་དེ་དག་གི་སྒྱུ་རྩལ་གྱི་རིན་ཐང་སོགས་ག་འདྲ་ཡོད་པའང་ངས་མི་ཤེས་མོད།གང་ལྟར་ས་ཆ་ཆུང་ཆུང་ཞིག་ཏུ་ཕྱོགས་ཡར་མར་གྱི་སློབ་ཕྲུག་ཚོའི་རྒྱུད་དུ་སྲོལ་རྒྱུན་རིག་གནས་སྲུང་སྐྱོང་དང་རྒྱུན་འཛིན་དང་དར་སྤེལ་གཏང་བའི་ས་བོན་ལེགས་པར་བཏབ་ཅིང་ཁ་ཕྱོགས་དྲང་པོ་བསྟན་པར་མ་ཟད། ཁོང་རང་གིས་དངོས་སུ་སྣེ་ཁྲིད་དེ་མདུན་དུ་སྐྱོད་པའི་འབད་འབུངས་ཀྱི་སྙིང་སྟོབས་འདི་ལ་རྗེས་སུ་ཡི་རང་དང་དད་གུས་བྱ་རྒྱུ་ནི་ཀུན་གྱི་འོས་འགན་ཡིན་པ་འདྲ།
ཡེ་ཤེས་ཆོས་འཕེལ་ལགས་ཀྱིས་ཡུལ་ཤུལ་དུ་ས་འགུལ་བྱུང་རྗེས་སུ་ཁྱིམ་གཞི་བསྐྱར་འཛུགས་བྱ་བའི་ཁྲོད་དུ་རང་ནུས་ཅི་ལྕོགས་ཀྱིས་གནོད་འཚེ་ཐེབས་པའི་མི་མང་མང་ཚོགས་ལ་རོགས་སྐྱོར་གནང་བས་ཁུལ་དང་རྫོང་གིས་ཁོང་ལ་གཟེངས་བསྟོད་བྱས་ཤིང་བྱ་དགའ་གནང་།ཁོང་གིས་ལས་རིགས་ལག་རྩལ་སློབ་གྲྭ་བཙུགས་ནས་ས་དེའི་མང་ཚོགས་ལ་ཕྱོགས་གང་ཐད་ནས་རོགས་སྐྱོར་བྱས་པ་དང་རྗེས་རབས་པ་རྣམས་ལ་མི་རིགས་རང་གི་སྲོལ་རྒྱུན་རིག་གནས་དང་ལག་རྩལ་ཁྲིད་པས་རིམ་པ་སོ་སོའི་འབྲེལ་ཡོད་ལས་ཁུངས་དུ་མས་ཁས་ལེན་དང་གདེང་འཇོག་གནང་།ཉེ་སྔོན་ཁོང་གིས་གེ་སར་སྒྲུང་ཐང་བརྒྱ་ཐམ་པ་ལེགས་གྲུབ་བྱུང་ནས་སྐྱེ་རྒུ་མདོ་རུ་འགྲེམ་སྟོན་བྱས་པ་ལ།ཞིང་ཆེན་ཕྱི་ནང་གི་འབྲེལ་ཡོད་ལས་ཁུངས་དང་ཡུལ་ཤུལ་ཁུལ་གྱི་སྲིད་ཕྱོགས་མགོ་ཁྲིད་དམ་རིག་གཞུང་ཉམས་ཞིབ་པ་མང་པོས་བསྟོད་པའི་མཐེ་བོང་བསྒྲེངས་ཤིང་ས་གནས་མང་ཚོགས་ཀྱིས་དགའ་བསུ་ཆེན་པོ་ཞུ་བའི་སེམས་བསྟན།ཐེངས་འདིར་ང་ཚོ་མཚོ་སྔོན་ཞིང་ཆེན་གེ་སར་སྒྲུང་སྲུང་སྐྱོབ་ཞིབ་འཇུག་ལྟེ་གནས་ཀྱང་ཆེད་དུ་གཡང་མགོ་མ་ཟེར་བའི་ལུང་པ་འདིར་ཡོང་ནས་ཁོ་ཚོར་གེ་སར་རིག་གནས་རྒྱུན་འཛིན་རྟེན་གཞི་ཞེས་པའི་ཐེམ་བྱང་དང་དཔང་ཡིག་གནང་བ་ཡིན།
ས་གཞི་ཀོ་བས་མི་ཁེབས་ཀྱང་། ལྷམ་མཐིལ་ཀོ་བས་གཡོགས་ན་ཆོག་ཅེས་པའི་གཏམ་དཔེ་ཞིག་ངའི་ཡིད་དུ་དྲན་བྱུང་།
ཡེ་ཤེས་ཆོས་འཕེལ་ལགས་ཀྱིས་ང་ལ་གསུངས་དོན། ཐང་ཀ་སློབ་པ་ལ་ཐོག་མར་ཐིག་རྩ་ཇི་ལྟར་བྲི་བའི་ཚད་དེ་ངེས་པར་དུ་ཐིག་ཡིག་བློར་འཛིན་དགོས་པ་རེད།ལྷ་ཞི་བ་དང་ཁྲོ་བོ་དང་ཞི་མ་ཁྲོ་སོགས་མི་འདྲ་བ་རེ་རེའི་སྐུ་བརྙན་དེ་ཐང་ཀའི་ངོས་སུ་ཇི་ལྟར་བྲི་དགོས་ལུགས་དེ་ཐིག་རྩ་གཅིག་གྱུར་ཡིན་པ་རེད། ལས་རིགས་ལག་རྩལ་སློབ་གྲྭ་འདི་ནས་སློབ་མཐར་ཕྱིན་པའི་སློབ་མ་བདུན་ཅུ་ལྷག་ཡོད་པ་དེ་དག་གིས་ད་ལྟ་རང་རྐྱ་ཐུབ་པར་ཐང་ཀ་འབྲི་བ་དང་གཞན་ལ་སློབ་ཁྲིད་ཀྱང་བྱེད་ཐུབ་ཀྱི་འདུག གསོ་རིག་འཛིན་གྲྭའི་སློབ་མ་རྣམས་མ་འོངས་པ་ན་ས་མཐའི་ཡུལ་ཕྱོགས་འདིའི་མི་མང་གི་བདེ་ཐང་སྲུང་མཁན་དུ་འགྱུར་རྒྱུའི་རེ་བ་ང་ལ་ཡོད་ཅེས་ཟེར། །
