ཟླ7པའི་ཚེས4ཉིན། ཞིང་ཆེན་ཏང་ཨུའི་ཧྲུའུ་ཅིའམ་ཞིང་ཆེན་ཏང་ཨུའི་ཁྱོན་ཡོངས་བཅོས་བསྒྱུར་ཟབ་སྤེལ་ཨུ་ཡོན་ལྷན་ཁང་གི་ཀྲུའུ་རེན་ཁྲེན་ཀང་གིས་མགོ་འཛིན་བྱས་ཏེ་ཞིང་ཆེན་ཏང་ཨུའི་ཁྱོན་ཡོངས་བཅོས་བསྒྱུར་ཟབ་སྤེལ་ཨུ་ཡོན་ལྷན་ཁང་གི་གྲོས་ཚོགས་ཐེངས་ཉེར་བཞི་པ་བསྡུས་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་ཁྱོན་ཡོངས་བཅོས་བསྒྱུར་ཟབ་སྤེལ་ཨུ་ཡོན་ལྷན་ཁང་གི་གྲོས་ཚོགས་ཐེངས་ལྔ་པའི་སྟེང་གནང་བའི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བྱས་པ་དང་། རང་ཞིང་གི་བཅོས་བསྒྱུར་ཕན་འབྲས་ལ་རྩིས་བཤེར་བྱས་ཏེ། སྔར་ལས་ལྷག་པའི་སྒོ་ནས་རང་ཞིང་གི་ཁྱོན་ཡོངས་བཅོས་བསྒྱུར་ཟབ་སྤེལ་བྱ་བར་འཆར་འགོད་བྱས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོག་ཞིབ་མཛད་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱས་ཏེ། བཅོས་བསྒྱུར་ཟབ་སྤེལ་གྱིས་འགག་ས་བསལ་ནས་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་བྱེད་པར་ནུས་ལྡན་གྱི་སྒུལ་ཤུགས་དང་ལམ་ལུགས་ཀྱི་འགན་སྲུང་འདོན་སྤྲོད་བྱེད་དགོས་པ་ནན་གྱིས་བསྟན།

གྲོས་ཚོགས་ཀྱིས་རང་ཞིང་གིས་ཁྱོན་ཡོངས་བཅོས་བསྒྱུར་ཟབ་སྤེལ་བྱ་བའི་ཐད་བླངས་པའི་གྲུབ་འབྲས་གཙོ་བོར་ཁས་ལེན་གང་ལེགས་བྱས་ནས་བསྟན་དོན།ལོ་འདི་འགའི་རིང་།རང་ཞིང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་བྱ་བའི་ཐད་བཏོན་པའི་བླང་བྱ་གལ་ཆེན་ལ་དམ་པོར་དམིགས་ནས“མཐོ་ས”བསྐྲུན་པ་དང“གནས་བཞི”འཛུགས་སྐྲུན་ལ་དམིགས་པ་དང་། མི་རིགས་མཐུན་སྒྲིལ་དང་དམངས་འཚོ་ལེགས་བཅོས། ཏང་འཛུགས་སྐྲུན་སོགས་ཀྱི་བྱ་བ་གཙོ་བོར་དམིགས་ཏེ། རྨང་གཞི་རང་བཞིན་དང་ཡུན་རིང་རང་བཞིན། འཐབ་ཇུས་རང་བཞིན། སྤྱི་ཁྱབ་རང་བཞིན་བཅས་ལྡན་པའི་བཅོས་བསྒྱུར་བྱ་བ་གལ་ཆེན་སྐོར་ཞིག་ཇུས་འགོད་དང་ལག་བསྟར་བྱས་པས་ད་ལྟ་དང་མ་འོངས་པའི་མཚོ་སྔོན་ལ་ཤུགས་རྐྱེན་ཟབ་མོ་ཐེབས་ཡོད།

གྲོས་ཚོགས་ཀྱིས་ནན་གྱིས་བསྟན་དོན། འཚོགས་ལ་ཉེ་བའི་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་ནི། རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་འཐབ་ལམ་གསར་པའི་སྟེང་ཁྱོན་ཡོངས་བཅོས་བསྒྱུར་སྔར་ལས་ཟབ་སྤེལ་བྱེད་པའི་སྤྱིའི་སྐུལ་སློང་དང་སྤྱིའི་བཀོད་སྒྲིག་ཅིག་ཡིན། ཆབ་སྲིད་ཀྱི་ལངས་གནས་མཐོ་རུ་བཏང་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཁྱོན་ཡོངས་བཅོས་བསྒྱུར་ཟབ་སྤེལ་སྐོར་གྱི་རྒྱས་བཤད་གལ་ཆེན་ལ་སློབ་སྦྱོང་དང་གོ་བ་གཏིང་ཟབ་ལེན་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོག་ཞིབ་མཛད་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་ལ་གཤིབ་སྡུར་བྱེད་པ། ཁྱོན་ཡོངས་ཀྱི་འཆར་འགོད་ལ་ཤུགས་སྣོན་པ་དང་གནད་དོན་གྱི་ཁྲིད་ཕྱོགས་མངོན་གསལ་དུ་དོད་པ་བཅས་བྱས་ཏེ། ཡུན་རིང་དུ་བྱས་རྗེས་འཇོག་ཐུབ་པར་བྱས་ཏེ། བཅོས་བསྒྱུར་ལ་བརྟེན་ནས་མཚོ་བོད་མཐོ་སྒང་གི་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་སྔར་ལས་འཕེལ་རིམ་ཆེན་པོ་འབྱུང་བར་སྐུལ་འདེད་གཏོང་དགོས། བཅོས་བསྒྱུར་གྱི་ཉམས་མྱོང་ཕྱོགས་སྡོམ་བྱེད་དགོས། ཁྱོན་ཡོངས་བཅོས་བསྒྱུར་ཟབ་སྤེལ་བྱེད་པའི་ལག་ལེན་ཁྲོད་གྲུབ་པའི་དཔེ་མཚོན་གྱི་སྒྲུབ་སྟངས་དང་ཉམས་མྱོང་ཕུན་ཚོགས་དེ་ཡུན་ཕན་ནང་རྐྱེན་དུ་བསྒྱུར་བ་དང་། བཅོས་བསྒྱུར་གྱི་རང་འགུལ་སྔར་ལས་ཆེ་རུ་གཏོང་བ། བཅོས་བསྒྱུར་གྱི་ངོས་འཛིན་གཅིག་ཏུ་བསྒྲིལ་བ། བཅོས་བསྒྱུར་གྱི་སྟོབས་ཤུགས་གཅིག་ཏུ་བསྡུ་དགོས། བཅོས་བསྒྱུར་གྱི་གྲུབ་འབྲས་སྲ་བརྟན་དུ་གཏོང་དགོས། བཙན་པོར་གདོང་གཏོད་ཕོད་ཅིང་འགན་འཁྲི་གཙང་འགན་འཁུར་ཕོད་པ་དང་། བཅོས་བསྒྱུར་ལ་བརྟེན་ནས་གཏིང་ཟབ་པའི་སྒྲིག་སྲོལ་དང་ནང་རྐྱེན་གྱི་འགལ་རྐྱེན་མེད་པར་བཟོས་ཏེ། གནད་དོན་ཐག་གཅོད་པའི་ཁྲོད་དུ་ཁྱོན་ཡོངས་བཅོས་བསྒྱུར་ཟབ་སྤེལ་གཏིང་ཟབ་ཏུ་གཏོང་དགོས།

བཅོས་བསྒྱུར་འགག་སྒྲོལ་གཏིང་ཟབ་ཏུ་གཏོང་དགོས། ཐོག་མཐའ་བར་གསུམ་དུ་བཅོས་བསྒྱུར་བྱེད་སྐབས་མ་གཏོགས་མཇུག་གྲུབ་པའི་སྐབས་མེད་པ་ཡིད་ལ་བརྟན་པོར་བཟུང་སྟེ། “མདུན་སྐྱོད་མ་བྱས་ན་ཕྱི་བཤོལ་ཡིན་པ་དང་། མདུན་སྐྱོད་དལ་བ་དེ་ཡང་ཕྱི་བཤོལ་ཡིན་པའི”འགན་འཁྲིའི་འདུ་ཤེས་དང་ཁ་ཚ་དགོས་གཏུགས་ཀྱི་འདུ་ཤེས་ཇེ་དྲག་ཏུ་བཏང་ནས། “ལས་བྱེད་པས་བསྒྲུབ་དགོས་པ་དང་། རིག་ལམ་གསལ་དགོས་པ། རང་གཅུན་ནན་དགོས་པའི”བྱ་སྤྱོད་དངོས་ལ་བརྟེན་ནས། ཁྱོན་ཡོངས་བཅོས་བསྒྱུར་ཟབ་སྤེལ་བྱེད་པར་བློ་བརྟན་འགྱུར་མེད་ཀྱིས་སྐུལ་འདེད་གཏོང་དགོས། བཅོས་བསྒྱུར་གྱི་སྤུས་ཚད་དང་ཕན་འབྲས་ཆེ་རུ་གཏོང་དགོས། མི་དམངས་མང་ཚོགས་ཀྱིས་བདེ་སྐྱིད་འཚོ་བར་བཅངས་པའི་རེ་སྨོན་དེ་དམིགས་ཡུལ་དུ་བཟུང་ནས། བཅོས་བསྒྱུར་བྱེད་ཐབས་ཇུས་འགོད་གཏིང་ཟབ་བྱས་ཏེ། བཅོས་བསྒྱུར་གྱི་མ་ལག་རང་བཞིན་དང་ཁྱོན་ཡོངས་རང་བཞིན། མཐུན་སྦྱོར་རང་བཞིན་བཅས་སྔར་ལས་ཇེ་དྲག་ཏུ་བཏང་སྟེ། རྒྱུན་ཆད་མེད་པར་བྱ་གཞག་འཕེལ་རྒྱས་ཀྱི་རྣམ་པ་གསར་པ་བསྐྲུན་དགོས།

གྲོས་ཚོགས་སྟེང《མཚོ་སྔོན་ཞིང་ཆེན་གྱི་ཐུན་མོང་ནགས་དབང་ལམ་ལུགས་བཅོས་བསྒྱུར་གཏིང་ཟབ་བྱེད་པའི་ལག་བསྟར་ཇུས་གཞིར》གྲོས་ཞིབ་བྱས་པ་དང་། རང་ཞིང་གི་ཁྱབ་ཁོངས་གཙོ་བོའི་བཅོས་བསྒྱུར་སྐོར་གྱི་གནས་ཚུལ་ལ་མཉན། ཞིང་ཆེན་ཁྱོན་ཡོངས་བཅོས་བསྒྱུར་ཟབ་སྤེལ་ཨུ་ཡོན་ལྷན་ཁང་གི་ཨུ་ཡོན་ལིའུ་མེ་ཕེན་དང་། ཀྲའོ་ཡུའེ་ཞ། ཚེ་རིང་ཐར། དབྱང་ཧྥ་སེན། ཀྲུའུ་ཞང་ཧྥེང་བཅས་ཚོགས་འདུར་ཞུགས། །