དུས་ཚོད་ནི་ཆུ་བོའི་རྒྱུན་དང་འདྲ་བར་ཉིན་མཚན་དབྱེར་མེད་དུ་རྒྱུག་བཞིན་གདའ། སྐད་ཅིག་ཙམ་ལ་དེ་རིང་གི་དུས་ཚོད་སང་ཉིན་གྱི་ལོ་རྒྱུས་སུ་འགྱུར་བ་ནི་འདས་ཟིན་པ་མཐའ་དག་དེ་རིང་གི་ལོ་རྒྱུས་སུ་གྱུར་ཡོད་པ་དང་གཉིས་སུ་མེད། ལོ་རྒྱུས་ལ་ཕྱིར་དྲན་བྱེད་དུས། ང་ཚོ་ཐོག་མཐའ་བར་གསུམ་དུ་མི་སྣ་མང་པོ་ཞིག་དང་འབྲེལ་འདྲིས་བྱུང་ཡོད་ཀྱང་། ངའི་བསམ་པའི་བརྩེ་འདང་གི་རྩིག་ལྡེབས་ངོས་སུ་ལྷམ་མེར་བཀྲ་བའི་རླབས་ཆེན་གྱི་སྐྱེས་བུ་དག་ནི་བདག་ལ་བཀའ་དྲིན་བླ་ན་མེད་པའི་དགེ་རྒན་དག་ཡིན།

དུས་ཚོད་ཀྱི་དཀྱོགས་མཚམས་རེ་རེ་ལས་མཇལ་བའི་བདག་གི་དགེ་རྒན་དག་ནི་ཕྱོགས་བཞི་མཚམས་བརྒྱད་ནས་སྐུ་ལུས་ཀྱི་སྨྱུ་གུ་འབུས་ཤིང་ཡལ་འདབ་རྒྱས་པའི་མི་སྣ་དག་ཡིན་མོད། ཁོང་རྣམ་པས་ང་ཚོར་གནང་བའི་ཤེས་བྱ་དང་སློབ་སྟོན་ནི་འཇིག་རྟེན་ཆོས་བརྒྱད་ཀྱི་བླང་དོར་ཡིན་ལ། ང་ཚོའི་ཤེས་རྨོངས་ཀྱི་སྨག་རུམ་སྟུག་པོ་དེ་སེལ་ཆེད་སྐུ་ལུས་ལ་ན་ཚ་བྱུང་ཡང་ཁྲིད་སྟེགས་སྟེང་སློབ་ཁྲིད་ལ་འབད་ཅིང་། མི་གཞན་པ་ལྟར་ལྷོད་ལྷོད་ངང་པུས་མོ་ལ་རྐང་པ་བཞག་སྟེ་འཚིག་ཇར་རོལ་ཞོར་སྟོང་བཤད་ལབ་ཁོམ་ཞིག་ཁྱོན་ནས་མེད་པར་ང་ཚོའི་མི་གཤིས་ཀུན་སྤྱོད་དང། སློབ་སྦྱོང་འཕེལ་རྒྱས། བསམ་བློ་ཀུན་སྤྱོད་སོགས་ལ་ཧུར་ཐག་འབད་ཐག་བགྱི་བཞིན་ཡོད་པས་ངས་དགེ་རྒན་ཁོ་ན་ནི་འཇིག་རྟེན་འདིའི་ལྷ་གསོན་པོ་དེ་ཡིན་ཞེས་བཤད་འདོད་དེ། ཁོང་རྣམ་པས་རྒྱུན་དུ་རང་དཔེ་གཞན་སྟོན་གྱིས་དཔེ་ཆར་མང་དུ་གཟིགས་ཤིང་ཐུགས་རྒྱུད་འཇམ་པོས་སྐད་ཆ་བཤད་ལུགས་དང་། སློབ་སྦྱོང་བྱེད་ལུགས་སོགས་བུམ་པ་གང་བྱོའི་ཚུལ་དུ་ང་ཚོར་གདམས་ངག་གི་བུམ་ཆུ་ཕངས་མེད་དུ་གནང་བས་ཁོང་ཚོ་ནི་ངེད་ཅག་གི་ཕ་མ་དང་གཉིས་སུ་མ་མཆིས། དགེ་རྒན་ནི་ནམ་མཁའི་རྒྱུ་སྐར་བཞིན་ང་ཚོ་མིའི་རིགས་དང་སྒོས་སུ་ང་ཚོ་སློབ་མ་ཡོངས་ཀྱི་སེམས་ཁོང་དུ་འོད་སྟོང་རྣམ་པར་འཕྲོ།

མི་ནི་ནམ་ཡང་བརྩེ་བས་བསྐྱང་དགོས་པའི་བདག་ཉིད་ཅན་ཞིག་ཡིན་ཞིང་། ང་ཚོ་སློབ་མ་རྣམས་ནི་ན་སོ་མ་སྨིན་ཞིང་སྤྱི་ཚོགས་ཀྱི་འཚོ་བ་ལ་ཆ་རྒྱུས་གསལ་པོ་མེད་པ། དཀར་ནག་གི་དབྱེ་བ་འབྱེད་པའི་ནུས་པ་ཞན་ཞིང་རིག་པའི་གཉོམ་ལག་ཕྲ་བའི་མེ་ཏོག་ཅིག་དང་གཉིས་སུ་མ་མཆིས་པས། དགེ་བའི་སེམས་དང་ལྡན་པའི་དགེ་རྒན་ཁོ་ནས་ང་ཚོ་ལ་ཕ་མ་ཞིག་གི་དོད་དང་ཕུ་ནུ་ཞིག་གི་འདང་ལྟར་བརྩེ་བས་སྐྱོང་བས།དགེ་རྒན་ནི་འཇིག་རྟེན་འདིར་དངོས་སུ་བྱོན་པའི་རྒྱལ་སྲས་བྱང་ཆུབ་སེམས་དཔའ་དེ་ཡང་ཅི་ལ་མིན།

གལ་ཏེ་ང་ཚོའི་འཚོ་སྡོད་ཀྱི་སྤྱི་ཚོགས་འདིར་དགེ་རྒན་མེད་ཚེ་མིའི་རིགས་ཀྱི་སྤྱི་ཚོགས་ནི་སྨག་རུམ་སྟུག་པའི་ཁམས་ཤིག་དང་དབྱེ་བ་ག་ལ་མཆིས། གལ་ཏེ་ང་ཚོའི་སྤྱི་ཚོགས་འདིར་དགེ་རྒན་མེད་ཚེ་སྤྱི་ཚོགས་གསར་པའི་གསར་སྐྱེས་ཀྱི་ན་གཞོན་ང་ཚོར་རིག་གནས་ཀྱི་འདོད་འཇོ་སུ་ཡིས་སྩོལ། གལ་ཏེ་ང་ཚོའི་སྤྱི་ཚོགས་འདིར་དགེ་རྒན་མེད་ཚེ་སྤྱི་ཚོགས་གསར་པ་ཡི་འཕེལ་རྒྱས་བྱ་རྒོད་འཕུར་བ་ལྟར་འགྲོ་ག་ལ་སྲིད།

དགེ་རྒན་ལགས། ཁྱེད་ནི་ངའི་བླ་སྲོག་གི་བདག་པོ་ཨང་། །