འཆར་སྣང་བུང་བའི་གཤོག་གླུ།
རྨ་ལྷོ། མཆོག་གསུམ་སྐྱབས།
དགེ་རྒན།
ཚེ་སྲོག་མར་མེའི་ཀློང་ལ་འཐིམ། །
ཤེས་རིག་འོད་ཀྱི་མིག་ཟུང་སྦྱིན། །
གྱ་ཙེ་གོམ་ཙེ་སློབ་པའི་དྲིན། །
གསེར་སྲང་སྟོང་གིས་ཁུགས་རེ་སྐན། །
ཨ་མ།
རྣམ་ཤེས་རྟེན་འབྱུང་ས་བོན་བསྐྲུན། །
བརྩེ་བའི་ནུ་ཞོས་གཉོམ་ལག་རྒྱས། །
དཀའ་ཚེགས་ཁུར་བོ་བཟོད་པ་ཡི། །
ཨ་མའི་སེམས་ནི་ཆུ་བོའི་རྒྱུན། །
སེམས།
གློག་འགྱུ་གར་དང་མཚུངས་པ་ཡི། །
སེམས་འདི་ཁུགས་སོའི་ན་བུན་བཞིན། །
སྔ་དྲོ་དགའ་ལ་ཕྱི་དྲོར་སྡུག །
རླུང་གིས་འཁྱེར་བའི་ལོ་མ་བཞིན། །
གྲོགས་པོ།
དཀའ་བའི་དུས་སུ་ཕྱག་གིས་འཇུ། །
རྒུད་པའི་དུས་སུ་མཐའ་ནས་བསྐྱོར། །
མི་འགྱུར་མཛའ་བརྩེ་འོ་ཆུ་བཞིན། །
ཕྱི་ཐག་རིང་བ་གྲོགས་ཀྱི་མཆོག །
དཔེ་ཆ།
རྒྱལ་ཁམས་མཐོང་ལ་དཔྱོད་ཤེས་རྒྱས། །
བློ་གྲོས་སྩོལ་ལ་འཇུག་ལྡོག་ཤེས། །
མུན་པ་འཇོམས་ལ་ཐེ་ཚོམ་གཅོད། །
དང་བ་འདྲེན་ལ་སྟོབས་ཤུགས་སྩོལ། །
གཞིས་ཁྱིམ།
མི་ཚེའི་ངལ་གསོའི་གཟིམ་ཁྲི་སྟེ། །
སྐྱིད་སྡུག་གང་འདོད་དབོ་ཆོག་ལ། །
རང་དབང་གསང་བ་དགའ་སྐྱོ་འབུམ། །
ཁྱོད་ཀྱི་རུམ་ན་མེད་པ་མེད། །
སོ་ནམ་པ།
ཤོ་ཡི་ཞིང་ས་གཤིན་པོ་རུ། །
འབྲུ་ལྔའི་མེ་ཏོག་འཐུ་བ་བོ། །
བཟའ་བཏུང་ལོངས་སྤྱོད་མཚོ་མོ་འདི། །
ཁྱོད་ཀྱི་དཀའ་བ་བརྒྱ་ལས་བྱུང་། །
འབྲོག་པ།
མཐོ་སྒང་ནམ་མཁའི་རྩྭ་ཐང་ན། །
ཙག་དང་བསེར་བུར་གདོང་གཏད་ནས། །
ཕྱུགས་ཀྱི་སྐར་མ་འཚོ་བའི་བུ། །
གངས་རིའི་བདག་པོ་ཁྱོད་མིན་སུ། །