ཉི་མ།ཟླ་བ།མིག་དམར།ལྷག་པ།ཕུར་བུ།པ་སངས།སྤེན་པ།

རྒྱ་མཚོ་དང་ཁོའི“གྲོགས་པོ་ཚོ”།

1. རྒྱ་མཚོས་དགོ་བར་སྲུང་སྐྱོབ་བྱས་པ།

རྒྱ་མཚོས་ཁྲུང་ཁྲུང་སྐེ་ནག་ལ་ཚང་བཅའ་རོགས་བྱེད་བཞིན་པ།
དགོ་བ།

རྒྱ་མཚོ་ནི་མཚོ་བྱང་བོད་རིགས་རང་སྐྱོང་ཁུལ་ཧེ་ཡན་རྫོང་ཝ་མགྱོགས་ཞང་མདའ་བཞི་སྡེ་བའི་འབྲོག་པ་ཞིག་རེད། 1996ལོ་ནས་བཟུང་། ཁོས་རྩྭ་སའི་སྟེང་གི་དགོ་བ་ལ་དོ་ཁུར་བྱེད་མགོ་བརྩམས་པར་མ་ཟད། སྡེ་བའི་ནང་གི་མང་ཚོགས་ཀྱི་སྣེ་ཁྲིད་དེ་མཚོ་སྔོན་པོའི་མཐའ་འཁོར་དུ་གད་སྙིགས་འཐུས།

རྒྱ་མཚོས་དགོ་བར་སྲུང་སྐྱོབ་བྱས་པའི་དབང་གིས་ཡུལ་དེ་གར་སྙན་གྲགས་ཅུང་ཙམ་རྒྱས་ཡོད། “ངས་ཐོབ་བྱ་གང་ལའང་མ་དམིགས་པར་བྱ་བ་འདི་སྒྲུབ་དོན་ཅི་ཡིན་ཞེ་ན། ངས་ཁྱོད་ལ་རྒན་མོ་ལོ་ལོན་ཞིག་གི་གཏམ་རྒྱུད་ཅིག་བརྗོད་འདོད།”

“འདི་ནི་ལོ26གི་སྔོན་ནས་གླེང་དགོས། སྐབས་དེར། དགོ་བ་ཞིག་ཤི་གསོན་གཉིས་ཀྱི་མཚམས་སུ་གནས་ཤིང་། རྒན་མོ་ལོ་ལོན་ཞིག་གིས་མཐོང་མ་ཐག་ཏུ་དེ་སྐྱོབ་ཞོར་དང་མིག་ཆུ་བཞུར་ཞོར། ང་ལ་མོར་དགོ་བ་དེ་སྐྱོབ་རོགས་བྱེད་པའི་ཞུ་བ་བྱས། རྒན་མོ་ལོ་ལོན་དེས་བཤད་པའི་སྐད་ཆ་ད་དུང་ཡང་ངས་བརྗེད་ཐབས་བྲལ་ཏེ། མོས་དགོ་བས་ང་ཚོའི་སྲོག་བསྐྱབས་མྱོང་བས། ང་ཚོས་བལྟས་ལྟས་རིག་རིག་ལ་འདི་འཆི་རུ་འཇོག་མི་རུང་ཟེར། དེའི་རྗེས་སུ། ང་ཚོས་ཕྱུགས་ནད་སྨན་པ་བཙལ་ཡོང་མོད། འོན་ཀྱང་དུས་ཡུན་འགོར་འགྱངས་བྱས་པ་རིང་དྲགས་པས་དགོ་བ་སྐྱོབ་མ་ཐུབ། རྒན་མོ་ལོ་ལོན་དེའི་མིག་ཆུ་ནི་ངའི་སེམས་སུ་བཞུར་བ་དང་འདྲ་བས། སྐབས་དེ་ནས་བཟུང་། ངས་དགོ་བ་དེ་ཚོར་སྲུང་སྐྱོབ་བྱེད་པའི་སེམས་ཐག་བཅད། ངས་དགོ་བ་དག་ངའི་གྲོགས་པོ་དང་ཤ་ཉེའི་ཚུལ་དུ་བརྩིས་པ་ཡིན”ཞེས་རྒྱ་མཚོས་དེ་ལྟར་བཤད།

“དགོ་བ་བྱེ་མདོག དགོ་བ་སྐམ་རིལ……”ལོ་འདི་དག་གི་རིང་ལ་རྒྱ་མཚོས་སྐྱོབ་རོགས་བྱས་པའི་དགོ་བ་ཤིན་ཏུ་མང་ཞིང་། རྒྱ་མཚོའི་ལོ་ན་ཕྲ་བའི་བུ་ཆུང་གིས་སྙིང་རྗེ་བའི་དགོ་བ་དག་ལ་མིང་ཡང་བཏགས་ཡོད།

“འདི་ཚོར་ངས་སྒོར་མོ་མི་ཉུང་བ་ཞིག་བཏང་ཡོད” རྒྱ་མཚོའི་ཁྱིམ་དུ་ནམ་རྒྱུན་སྣུམ་བཏོན་འོ་མ་གྲ་སྒྲིག་བྱས་ཡོད་ཅིང་། “དགོ་ཕྲུག་གིས་འབྲི་མོའི་འོ་མ་འཐུང་ཚེ་ཁོག་པ་བཤལ་བས། དུག་སེལ་བྱས་ཡོད་པའི་སྣུམ་བཏོན་འོ་མ་འཐུང་ན་ད་གཟོད་ཁོག་ནས་འཇུ་ཐུབ། ཉིན་འགའི་རྗེས་སུ་ང་གྲོང་རྡལ་གྱི་སྒོ་རྩིས་ཚོང་རར་སོང་ནས་འོ་མ་ཤོག་སྒམ་འགའ་ཉོ་དགོས།”ཁོའི་གྲོགས་པོ་དེ་དག་གླེང་ཡོང་དུས། རྒྱ་མཚོ་རྒྱུན་པར་དགའ་སྤྲོས་ཁེངས་ཡོད།

“ཁྱོད་ཀྱིས་ཤེས་སམ། ང་དགོ་བའི་གམ་དུ་སོང་རུང་ཁོ་ཚོ་འབྲོ་མི་སྲིད། ཁྱོས་ལྟོས། དགོ་ཕྲུག་འདི3པོ་ནི་དགོ་བ་བྱེ་མདོག་གི་ཕྲུ་གུ་རེད” རྒྱ་མཚོས་ཁེངས་རློམ་དང་བཅས་ཁོ་དང་ཁོའི་གྲོགས་པོ་ཚོའི་བར་གྱི་འབྲེལ་བ་ཟབ་མོ་དེ་ང་ཚོ་ལ་ངོམས།

ཁ་བརྡ་བྱེད་སྐབས། རྒྱ་མཚོས་རྒྱུན་པར་ལག་གཡོན་པ་འགེབས་པར་བྱེད། ལོ་མང་པོར་ཆུ་འཁྱགས་ཁྲོད་དུ་གད་སྙིགས་འཐུས་པའི་དབང་གིས། ཁོའི་མཛུབ་མོ་དག་གི་ཚུགས་ཀ་འགྱུར་སྟེ་དྲང་མོར་བསྲིངས་མི་ཐུབ་པར་གྱུར་འདུག “ད་ལོར་ཞིང་ཆེན་གྱི་སྨན་ཁང་དུ་བརྟག་དཔྱད་བྱེད་དུ་སོང་བ་ཡིན། གྲུམ་བུ་དང་རུས་འཛེར་གཉིས་ཀ་འདུག དབང་རྩ་མནན་རྗེས་སྟབས་བདེ་བོ་མི་འདུག་མོད། སྐྱོན་མི་འདུག ད་ལྟ་སྲིད་གཞུང་གི་རོགས་སྐྱོར་ཡོད་པས། ང་ཚོའི་འགོག་སྲུང་ལག་ཆ་ཡང་ཇེ་མང་དུ་སོང་ཡོད་ལ། དང་བླངས་པའི་མི་གྲངས་ཀྱང་ཇེ་མང་དུ་སོང་ཡོད། ངས་ད་རུང་ལོ་འགའ་ལ་ལས་ཐུབ་ཀི”

2 . མང་ཚོགས་ཀྱིས་དགོ་བར་སྲུང་སྐྱོབ་བྱས་པ།

གཡང་སྐྱབས་ཚེ་རིང་ནི་རྒྱ་མཚོའི་སློབ་མ་ཞིག་སྟེ། ཁོ་ཚོས་མཉམ་དུ་དགོ་བ་ལ་སྲུང་སྐྱོབ་བྱེད་ཅིང་། མཉམ་དུ་མཐོ་སྒང་གི་སྲོག་ཆགས་པར་དུའང་ལེན་བཞིན་ཡོད། “ངའི་དགེ་རྒན་གྱི་ཁྱིམ་ནོར་ཡོད་ཚད་སྒམ་འདིའི་ནང་དུ་ཡོད།” ད་ལོར་ལོ28ཡིན་པའི་གཡང་སྐྱབས་ཚེ་རིང་ལ་ལས་ཀ་གསར་པ་ཞིག་ཡོད་མོད། འོན་ཀྱང་སྡེ་བའི་ནང་དུ་ཁོ་རང་མཁོ་ཚེ་རྒྱུན་པར་དུས་ལྟར་ཐོན་ངེས་རེད།

ཁོ་དང་ཁོའི་དགེ་རྒན་གཉིས་ཀྱིས་རྒྱུན་པར་སྒོར་མོ་གསོག་བཞིན་ཡོད་ལ། དེའི་དམིགས་ཡུལ་ནི་པར་ཆས་ཀྱི་བརྙན་མིག་དང་པར་ཆས་ལེགས་པོ་ཞིག་ཉོས་ནས། མཚོ་སྔོན་པོའི་འགྲམ་གྱི་སྲོག་ཆགས་དག་པར་དུ་ལེན་ཆེད་རེད། རྒྱ་མཚོའི་གཅེས་ནོར་ནི་ལོ་འདི་དག་གི་རིང་ལ་གཅེས་ཉར་བྱས་འོང་བའི་སྲ་སྡེར་དེ་ཡིན་ལ། གསོག་ཉར་སྣོད་ཆས་བཅུ་ཕྲག་ལྷག་གི་ནང་དུ་མཚོ་སྔོན་པོའི་འགྲམ་གྱི་ཆུ་བྱ་དང་དགོ་བའི་འདྲ་པར་གྱིས་བཀང་འདུག

“འདྲ་པར་འདི་དག་ནི་ངས་ཉེ་ལམ་གསར་དུ་བཀྲུས་པ་ཡིན་ལ། ན་ནིང་ལོ་གཅིག་རིང་གི་གྲུབ་འབྲས་ཀྱང་ཡིན” འདྲ་པར་ཁྲོད་དུ་ཁྱུ་དང་ཁྱུ་བྱས་པའི་དགོ་བ་ཡོད་ལ།

(འཕྲོ་མ་པར་ངོས11པར་གཟིགས།)